Политика за приватност

1. Што е MKPPZ

MKPPZ е софтвер за електронска евиденција на противпожарна опрема и уреди. Наменет е пред сè за фирми овластени за вршење работи од областа на заштитата од пожари, како и за правни лица кои таа опрема ја имаат во своите објекти.

Се состои од три дела кои работат заедно:

• порталот на адреса portal.mkppz.app, во кој фирмите водат евиденција за клиентите, објектите и опремата, планираат контроли и преземаат исправи;
• мобилната апликација „MKPPZ“, со која контролорите на терен ги читаат баркодовите од опремата и ги евидентираат наодите, и кога нема интернет врска;
• веб-страницата mkppz.app, на која ја претставуваме услугата.

За сето тоа да функционира, MKPPZ мора да обработува и одредени лични податоци, на пример кој ја извршил контролата и кога. Во оваа Политика за приватност објаснуваме, што е можно појасно, кои податоци ги обработуваме, зошто, колку долго ги чуваме и како можете да ги остварите своите права. Се трудиме да обработуваме само она што е навистина потребно.

2. Накратко

• Податоците не ги продаваме, не ги изнајмуваме и не ги користиме за рекламирање.
• Не користиме алатки за аналитика ни следење на посетителите, ниту колачиња за рекламирање.
• Податоците што Вашата фирма ги внесува за своите клиенти, објекти и вработени ги обработуваме во име на таа фирма и само по нејзин налог.
• При внес на контрола на терен се евидентира локацијата на телефонот, за да може да се потврди дека контролата е извршена на лице место.
• Лозинките ги чуваме само во форма на еднонасочен криптографски запис, така што ни ние не можеме да ги прочитаме.
• За сите прашања за приватноста сме Ви на располагање на office@mkppz.app.

3. Кој е контролор и како да не контактирате

Услугата MKPPZ во Република Северна Македонија ја обезбедува друштвото ПЕРПЕТУУМОБИЛЕ СЕКЈУРИТИ ДООЕЛ увоз-извоз Скопје, ул. „Гоце Николовски“ бр. 66/ДП1, 1000 Скопје, Карпош, ЕМБС 5016819, ЕДБ MK4030995245095 (во понатамошниот текст: „Перпетуумобиле“, „ние“).

Софтверот MKPPZ го развива и одржува друштвото Bordi d.o.o., ул. „Народни херои“ бр. 11, 11070 Нови Белград, Република Србија, матичен број 22058142, даночен број 114702479 (во понатамошниот текст: „Bordi“), кое податоците ги обработува во име на Перпетуумобиле, како обработувач.

За сите прашања и барања поврзани со личните податоци можете да ни пишете на office@mkppz.app или по пошта на адресата на Перпетуумобиле, со назнака „Заштита на личните податоци“.

Личните податоци ги обработуваме во согласност со Законот за заштита на личните податоци („Службен весник на Република Северна Македонија“ бр. 42/20) и другите важечки прописи.

4. На кого се однесува оваа политика и во која улога ги обработуваме податоците

Оваа Политика за приватност се однесува на:

• посетителите на веб-страницата mkppz.app;
• корисниците на порталот portal.mkppz.app и мобилната апликација „MKPPZ“ (администратори, контролори и други вработени во фирмите кои го користат MKPPZ);
• лицата чии податоци се наоѓаат во евиденцијата што фирмите ја водат во MKPPZ, на пример контакт лица на клиентите;
• контакт лицата на нашите деловни партнери.

Две улоги во кои ги обработуваме податоците

Кога самите одлучуваме зошто и како се обработуваат податоците (на пример податоците за корисничките сметки, податоците за најавување и техничките дневници), Перпетуумобиле е контролор.

Кога фирмата што го користи MKPPZ внесува податоци за своите клиенти, објекти, опрема и вработени, таа фирма е контролор на тие податоци, а Перпетуумобиле ги обработува во нејзино име, како обработувач, во согласност со договорот за користење на сервисот MKPPZ. Bordi во тој случај учествува како подобработувач. Ако сте вработени во таква фирма или сте нејзин клиент, за овие податоци првенствено можете да се обратите до неа. Со задоволство ќе помогнеме и ние, а Вашето барање без одлагање ќе го проследиме до фирмата.

5. Посета на веб-страницата mkppz.app

Веб-страницата mkppz.app можете да ја прегледувате без никаква регистрација. Страницата не користи колачиња, аналитика ниту алатки за следење на посетителите.

За приказ на фонтовите и стиловите, страницата користи јавни сервиси на трети страни (Google Fonts и CDN сервисот на Tailwind). При посетата, Вашиот прелистувач до тие сервиси испраќа барање за преземање датотеки, па тие ја добиваат Вашата IP адреса и основни податоци за прелистувачот.

Доколку страницата содржи линкови до други веб-страници, на нив се применуваат политиките за приватност на тие страници, па Ве молиме да се запознаете со нив.

6. Корисничка сметка и најава на порталот и апликацијата

Отворање сметка

Сметката не се отвора автоматски. Кога фирмата ќе стане корисник на MKPPZ, нашиот тим ја отвора сметката на фирмата, а администраторот на фирмата потоа отвора сметки за своите вработени. За секоја сметка обработуваме:

• корисничко име и лозинка;
• име и презиме, работно место и датум на вработување, ако фирмата ги внесе;
• адреса на е-пошта, ако е внесена (се потврдува со код испратен на таа адреса);
• број на лиценца, односно овластување за вршење контрола, кај контролорите;
• улога во системот и дозволи, како и податок за тоа кој и кога ја отворил или изменил сметката.

Најавување

На порталот и во апликацијата се најавувате со корисничко име и лозинка. Лозинката никогаш не се чува во изворна форма, туку само како еднонасочен криптографски запис (argon2id). Ако вклучите најава во два чекора, по лозинката на е-пошта ќе добиете шестцифрен код кој важи 30 минути и може да се искористи само еднаш.

По успешна најава, порталот во прелистувачот чува безбедносно колаче на сесијата. Ако ја означите опцијата „Запомни ме“, најавата трае до 30 дена; во спротивно, престанува кога ќе го затворите прелистувачот. Мобилната апликација чува ознака за најавата на телефонот.

Историја на најавувања и безбедност на сметката

За заштита на Вашата сметка, при секоја успешна најава евидентираме време, IP адреса, оперативен систем на уредот и приближна локација (држава и град). Локацијата ја одредуваме врз основа на IP адресата, со помош на база на податоци што се наоѓа на нашиот сервер, па IP адресата притоа не се испраќа никому. Оваа историја можете да ја видите во својата сметка и оттаму да ги одјавите уредите што не ги препознавате. Го евидентираме и времето на Вашата последна активност.

Неуспешните обиди за најава не се запишуваат во базата; се следат само краткотрајно, во работната меморија на серверот, за да се спречи погодување на лозинката.

Известување за политиката во порталот

При првото отворање на порталот Ви се прикажува известување со линк до оваа Политика за приватност. Неговата цел е да Ве информира; правниот основ за обработка на податоците е наведен во делот 9.

7. Работа во порталот и мобилната апликација

Евиденција што ја води Вашата фирма

Фирмата што го користи MKPPZ внесува податоци за клиентите (назив, ЕДБ, ЕМБС, адреса, контакт телефони и адреси на е-пошта), објектите (назив, адреса и локација на мапа) и опремата. Овие податоци главно се однесуваат на правни лица, но можат да содржат и податоци за физички лица, на пример е-пошта или телефон на контакт лице. Тие податоци не ги добиваме од Вас лично, туку од фирмата што ги внесува, и ги обработуваме исклучиво во нејзино име.

Евиденција на активностите

За евиденцијата да биде веродостојна, системот при контролите, сервисите, процедурите и другите измени памети кој и кога ги внел. На тој начин за секој уред може да се утврди целосната историја, што е важно и за фирмата и за нејзините клиенти и надлежните органи.

Податоци од терен

Кога контролорот во мобилната апликација внесува контрола или сервис на уред, со внесот се евидентираат:

• GPS координатите на телефонот и нивната прецизност, како и ознака дали локацијата на телефонот е лажирана;
• траењето на контролата и начинот на внес на баркодот (со читање или рачно);
• верзијата на апликацијата и времето кога внесот стигнал на серверот.

Овие податоци служат да се потврди дека контролата навистина е извршена на лице место, што е основа за довербата во исправата за контрола. Локацијата се евидентира само во моментот на внесот, движењето на контролорот не се следи и апликацијата не ја користи локацијата во позадина. Доколку објектот е означен како строго доверлив, локацијата не се евидентира.

Документи

Исправите за контрола што ги изработува MKPPZ содржат име и презиме на контролорот и број на лиценца, како и податоци за фирмата и клиентот, бидејќи тоа го бараат прописите за заштита од пожари. Во системот се чуваат и документите што фирмата самата ги прикачува (дозволи, полиси, лого и слично) и извозите што ги прави.

Пријава на проблем и известувања

Ако преку порталот ни пријавите проблем, пријавата, заедно со Вашето име и линк до профилот, се проследува до нашиот тим за поддршка. Известувањата во порталот се бришат автоматски по два месеци. Ако ги вклучите, по е-пошта испраќаме само системски известувања (на пример кодови за најава и потсетници); не испраќаме рекламни пораки.

8. Мобилната апликација на Вашиот уред

Со преземање на апликацијата од платформата Google Play, пред најавата на сметката, не собираме никакви лични податоци. На преземањето се применуваат правилата на компанијата Google.

Апликацијата ги бара следниве дозволи:

• камера: само за читање баркодови; апликацијата не прави и не испраќа фотографии;
• локација: само додека апликацијата е отворена, за евидентирање на местото на контролата;
• Bluetooth: за поврзување со печатач за налепници.

Дозволите можете во секое време да ги повлечете во поставките на телефонот, при што соодветните функции тогаш нема да бидат достапни.

За да биде можна работата на терен и без интернет врска, апликацијата на телефонот чува копија од податоците потребни за работа (клиенти, објекти, уреди, процедури) и внесови што сè уште не се испратени на серверот. Тие податоци се синхронизираат со серверот кога врската ќе стане достапна. Одјавата не е можна додека на телефонот има внесови што сè уште не се испратени на серверот. Со одјавата од телефонот се бришат преземените податоци и податоците за најавата; ако во апликацијата сте најавени на повеќе сметки, одјавата важи за сите.

9. Цели и правни основи на обработката

Секоја обработка ја засноваме на еден од правните основи што ги дозволува Законот за заштита на личните податоци. Прегледот е даден во табелата.

Кога обработката се заснова на легитимен интерес, претходно сме процениле дека тој не преовладува над Вашите права и интереси. Имате право да поднесете приговор на таквата обработка (види дел 15).

Податоците не ги користиме за ниту една друга цел освен наведените, освен кога тоа го налага законот.

10. Кој друг има пристап до податоците

Вашите податоци не ги продаваме и не ги изнајмуваме. Пристап имаат само оние на кои тоа им е неопходно за обезбедување на услугата:

• Вашата фирма: администраторите и другите корисници од Вашата фирма ги гледаат податоците во согласност со улогите што фирмата им ги доделила.
• Перпетуумобиле: овластени вработени, само во мера потребна за обезбедување на услугата и поддршка на корисниците.
• Bordi d.o.o. (Србија): овластени вработени, како обработувач, само во мера потребна за развој, одржување, поддршка и безбедност на системот.
• Давател на услугата хостинг: Akamai Technologies (Linode), на чии сервери во Франкфурт (Германија) се наоѓаат апликацијата и базата на податоци.
• Google: на серверите на Google го чуваме поштенското сандаче на тимот за поддршка, во кое стигнуваат пријавите за проблеми и техничките извештаи за грешки, како и резервните копии, кои пред испраќањето се шифрираат, така што Google не може да ја прочита нивната содржина.
• OpenStreetMap: мапата во порталот го презема приказот од серверите на OpenStreetMap, на кои притоа им е достапна Вашата IP адреса.
• Google Fonts и CDN сервиси: за приказ на фонтовите и стиловите на веб-страницата и порталот.
• Државни органи: само кога тоа го налага законот, врз основа на барање од надлежен орган.

Со обработувачите имаме договори, односно прифатени услови за обработка, со кои се обврзуваат податоците да ги чуваат како доверливи и да ги користат само за обезбедување на услугата за нас.

11. Пренос на податоци во странство

Серверот на кој се наоѓаат апликацијата и базата на податоци се наоѓа во Германија, држава членка на Европската унија.

Bordi, кој го развива и одржува софтверот, се наоѓа во Република Србија, па неговите овластени вработени пристапуваат до податоците од Србија, само во мера потребна за одржување, поддршка и безбедност на системот.

Одредени сервиси на компанијата Google и другите сервиси наведени во претходниот дел можат да обработуваат лични податоци и во Соединетите Американски Држави или во други држави надвор од Европа.

Пренос на податоци надвор од Република Северна Македонија вршиме само ако се исполнети условите пропишани со Законот за заштита на личните податоци, со примена на соодветни заштитни мерки. Резервните копии на базата на податоци се шифрираат пред испраќањето до сервисот за складирање, со што содржината на копиите се штити од неовластен пристап на давателот на услугата.

12. Колку долго ги чуваме податоците

Податоците ги чуваме само онолку колку што е потребно за целта заради која се собрани, односно онолку колку што бараат прописите.

По истекот на рокот, податоците ги бришеме или трајно ги правиме анонимни. Податоците од резервните копии се бришат со истекот на рокот на чување на копијата, а дотогаш не се користат за ништо друго освен за враќање на системот во случај на дефект.

13. Како ги штитиме податоците

Безбедноста на податоците ни е еден од приоритетите. Применуваме технички и организациски мерки со кои податоците ги штитиме од неовластен пристап, измена, губење или уништување, меѓу кои се:

• шифрирана врска (HTTPS) меѓу Вашиот прелистувач или апликацијата и серверот;
• чување на лозинките исклучиво во форма на еднонасочен криптографски запис;
• можност за најава во два чекора и ограничување на бројот на обиди за најава;
• пристап до податоците според улоги, така што секој корисник го гледа само она што му е потребно;
• шифрирани резервни копии;
• пристап до серверите само за овластени членови на тимот.

Доколку сепак дојде до повреда на безбедноста на личните податоци која може да ги загрози Вашите права, за тоа ќе ја известиме Агенцијата за заштита на личните податоци и, кога тоа е предвидено со прописите, и Вас, без непотребно одлагање.

14. Колачиња и локална меморија на прелистувачот

Веб-страницата mkppz.app не користи колачиња. Порталот користи само едно колаче, кое е неопходно за работа: колачето на сесијата, преку кое порталот знае дека сте најавени. Ова колаче не е достапно за скриптите на страницата, се испраќа само преку шифрирана врска и не се користи за следење.

Во локалната меморија на прелистувачот порталот ги чува Вашите поставки (изглед, избрани картички и слично), ознаката дека сте го виделе известувањето за приватност и нацртите на обрасците што сè уште не сте ги испратиле. Овие податоци остануваат на Вашиот уред и можете да ги избришете во поставките на прелистувачот.

Не користиме колачиња за аналитика ниту за рекламирање, па за нив и не бараме согласност.

15. Вашите права

Во врска со своите лични податоци имате право да:

• дознаете дали ги обработуваме Вашите податоци, да пристапите до нив и да добиете нивна копија;
• барате исправка на неточните или дополнување на нецелосните податоци;
• барате бришење на податоците, кога за нивна понатамошна обработка нема основ;
• барате ограничување на обработката;
• ги добиете податоците што ни ги дадовте во структурирана, вообичаено користена и машински читлива форма и да ги пренесете кај друг контролор;
• поднесете приговор на обработка што се заснова на легитимен интерес;
• ја повлечете согласноста, кога обработката се заснова на неа, при што повлекувањето не влијае на законитоста на обработката пред повлекувањето.

Барањето можете да ни го испратите на office@mkppz.app или по пошта на адресата на Перпетуумобиле. Ќе одговориме без непотребно одлагање, а најдоцна во рокот предвиден со прописите. Остварувањето на правата е бесплатно. За да ги заштитиме Вашите податоци, пред да постапиме можеме да побараме да го потврдите својот идентитет.

Ако барањето се однесува на податоци што ги обработуваме во име на Вашата фирма (види дел 4), ќе го проследиме до фирмата и ќе ѝ помогнеме да постапи по него.

Ако сметате дека обработката не е во согласност со прописите, имате право да поднесете барање до Агенцијата за заштита на личните податоци на Република Северна Македонија, www.azlp.mk. Ќе Ви бидеме благодарни ако пред тоа се обратите до нас, за да се обидеме заедно да го решиме проблемот.

16. Автоматизирано донесување одлуки и профилирање

Не донесуваме одлуки исклучиво врз основа на автоматизирана обработка кои би предизвикале правни последици за Вас или значително би влијаеле на Вас, и не вршиме профилирање. Податоците за начинот на внес на контролата (на пример ознаката за лажирана локација) служат како информација за фирмата, а за нивното значење одлучуваат луѓе.

17. Поими

• Личен податок е секоја информација што се однесува на идентификувано физичко лице или физичко лице кое може да се идентификува, директно или индиректно.
• Обработка е секоја операција врз личните податоци, како што се собирање, евидентирање, чување, користење, пренос или бришење.
• Контролор е лицето кое ги утврдува целите и начинот на обработката.
• Обработувач е лицето кое ги обработува податоците во име на контролорот.
• Корисник е физичко лице кое го користи порталот portal.mkppz.app или мобилната апликација „MKPPZ“.
• Фирма е правно лице или трговец поединец кој со Перпетуумобиле склучил договор за користење на сервисот MKPPZ.

18. Измени на Политиката за приватност

Политиката за приватност повремено ја усогласуваме со промените во MKPPZ и во прописите. Важечката верзија е секогаш објавена на оваа страница, со датумот од кога важи. За значајните измени ќе ги известиме регистрираните корисници во порталот или по е-пошта, а ако новата обработка бара Ваша согласност, ќе ја побараме пред да започнеме со неа.

Ви благодариме на довербата. Ако нешто во оваа политика не е доволно јасно, слободно пишете ни на office@mkppz.app.